حرص الفنان محمد أنور على دعم ومساندة الفنان أحمد السقا بعد الانتقادات الموجهة له مؤخرًا بسبب مساندته للاعب محمد صلاح في أزمته مع نادي ليفربول، وقد نشر محمد أنور صورة تجمعهما عبر حسابه الرسمي على موقع تبادل الصور والفيديوهات إنستجرام. 

وأرفقها محمد أنور بتعليق قائلًا: "احمد السقا فعلا ميجا ستار، فيه ناس بتقولها علي نفسها معملوش ربع تاريخه ولا اعمالهم هتعيش وهتعلم زي اعماله، كل افلامه علامات في تاريخ السينما المصرية، أحمد السقا اصبح ايقونه في الاكشن والناس في الشارع لما بتلاقي واحد قلبه جامد بتقوله ( انت فاكر نفسك أحمد السقا ولا ايه)".

واستكمل محمد أنور حديثه قائلًا: "ومحمد صلاح عمل تاريخ مشرف واصبح ملهم وخلي المستحيل ممكن ووصل لمكانة اظن مفيش حد عربي هيوصلها تاني علي الاقل طول ماحنا عايشين، فبدل مانفرح اننا حضرنا ده لا بنحاول نهده ونفرح فيه وبنتمني وقوعه بسرعة وقبلهم مجدي يعقوب وعمرو دياب ومني زكي وخوض في اعراض ومين طلق ومين اتجوز ومين مات وغيرهم كتير، السوشيال ميديا مفيدة احيانا وفيها ناس محترمة كتير وكلامهم مهم واراءهم محترمة حتي لو كان نقد سلبي لكنهم للاسف قلة، أما الغالبية العظمي والاكثر تأثيرًا علي السوشيال ميديا كلها ترندات هدم سواء في شخص او مجتمع وشتايم وتريقة واثارة فتن ودي بتأثر عالوعي الجمعي اكتر".

واختتم محمد أنور متشوره قائلًا: " وانا نفسي بتأثر بده حتي لو كنت اعرف الشخص ده وعارف انه مايعملش كده لكني للاسف بصدق السوشيال ميديا اصبحت مرعبه حقيقي وطلعت كل اللي في النفوس، بقي سهل الواحد يطلع كل السواد اللي جواه في الحقيقة عالسوشيال ميديا من غير خوف لان محدش شايفه ولا هيحاسبه ومحدش بيحط نفسه مكان اللي بيشتمه ده انه مهما كانت نجوميته او مركزه وقيمته في المجتمع، فهو في الاخر انسان زيك لما يقرأ الكلام ده او حد من اهله او اولاده ممكن يحصله ايه وهينام اليوم ده عامل ازاي ومحدش بيديله فرصه يدافع عن نفسه يمكن يبقي مظلوم بس ازاي نسمع منه كده الترند هيبوظ المهم هو الترند، هنستلم مين النهارده ونهينه هو واهله بسرعة مفيش وقت عشان بكره فيه ترند جديد وضحية جديدة هينام بكره معيط هو كمان".